0,00 S/

No hay productos en el carrito.

21.8 C
Lima
jueves, enero 20, 2022

Sapanka k’ikllukunamantan haykumunku,

San Juan de Lurigancho, Lima llaqta

hantunqaray aqollaqta kanchanman;

sipas warmikuna wayna qharikuna tususpa,

k’achay k’achay chillanchalla p’achakunawan,

saruchankun aqo aqo pampakunatapas.

 

Wakinpaqchá aqopas rumipas llakiy llakiy,

qhaswaqkunapaqqa apulliq qespimuyninmi;

ch’isi ch’isillanpin sonqollankupi yuyarinku

tayta mamankunaq ayllunkupi ñak’ariyninta.

 

-Manan chinkananchu mikhuyninchis,

ch’akipayninchis, takiyninchis, tusuyninchis,

yawarninchis, karu karu llaqtakunapi

kaspallapas, yuyariwankikun kusisqa,

runasimichapi takipakuspa.

Nispan kamachikuran Machu Puma

umalliqnin, aylluq kacharpariyninpi.

 

Wakin puripakuspa, llank’apakuspa,

yanapakuspa, chayamurankun Lima urayman;

huñunakuspataq hatun tutapi haykuypuranku

Luriwanchu aqopampaman, soqos mayt’uwan,

k’ullukunawan wasichakunankupaq.

 

Pisi pisillamantan llut’aranku llaqtankuta,

k’ikllunkuta, kanchankuta, ayllu wasinkuta,

wawawasikunata, yachaywasinkuta,

wayra wasinkuta, qhatu wasinkunatapas;

ch’usaqllamantan paqarichiranku llank’ayta

hatunraq chikanraq, qhatukunapi.

 

-Iskay chunka piskayuq watamantañan kutimunkichis,

chaypaqka ch’akipunkañachá ñak’ariypas,

manapunin wañuyta suyasunmanchu.

 

-Hatun rumi orqomanta urmaymuqtinqa,

runakunaqa ayqerinallanchismi,

manan atipasunmanchu sayachiytaqa;

chhaynallataqmi kunanpas, noqayku machu

payakuna qhepasaqku herq’ekunallawan

machu ayllunchispi, qankunataq qespechinkichis

llapamanta ayllunchiskunata, karu llaqtakunapi.

 

-Chhaynatan pisipasunchis ñak’ariy wañuyta,

turiyasunchismi kawsayta, mosoq pacha

chayamunankama.

Chaymi Pachakutiy sutichasqa.

Sonqollanchiswanmi munanakusun

yuyariykusun, waqyarinaykusun.

Kutimuspañachá ayllunchista perqapunkichis,

imaynatas munankichis chhaynata.

Hamut’aran Willka Runa, Wanka Rumi

patamanta, puririy qallarisaqtin.

 

Nanayqa nanaypunin, k’iriyqa k’iriypunin;

watantin p’unchawkunapin uyarillaqku,

tayta mamankuq wañuyninta;

sapanka saminchayllapin haywariqku

allin kawsayta, yawarchasqa llaqtankupaq;

atispa mana atispa, qolqellatan, p’achallatan

apachinku weqeywan hunt’asqata.

 

Chayamurankun hoq llaqtankunamantapas

p’asñawarmakunapas, llank’apakuq;

chaywanmi sayariranku qhapaqyanankukama,

qhatu wasinkupas wiñaranmi sapa watakunapi.

 

Iskay chunka piskayuq watapiñan,

tariranku maskhasqa p’unchawta;

Lima wichaymantan haykunpuranku qhaswaspa.

 

Inkariy kikillanmi huñunaykuranku,

hatun uma qhali kurkunwan,

Mawk’a Llaqta Mosoq Llaqtawan.

Pachamamanchistaq chaskillantaq kusisqa,

t’ikarispa allin kawsay paqarinanpaq,

teqsi muyunchispi.

 

Mana Yawar Mayu kutinpunanpaq.

Yana Mayu tukukapunanpaq.

 

(Libro: YAWARCHASQA TERRUKU)

Columnistas de Hoy

spot_img

Mantente conectado

1,900FansMe gusta
270SeguidoresSeguir
3,800SeguidoresSeguir
360suscriptoresSuscribirte

Últimos artículos

Dejar respuesta

Please enter your comment!
Please enter your name here