0,00 S/

No hay productos en el carrito.

19.1 C
Lima
lunes, mayo 16, 2022

I.- PAQARIMUY

Phuyu Qotaña

sumaq iphiñas,

pay Willka Paqoq

tiyanan kasqa.

 

Willka Paqosyá

waman warmipi,

churiyaqkasqa

qhari wawata.

 

Chay churichantas,

qhalicha kaqtin,

Willka Wamanta

sutichapusqa.

 

Kay wawasyari

waqasqa riki,

mamaq wiksanpi

kashaspallaraq.

 

Chaymanta pachas

Willka Paqoqa,

ña watusqaña

paqo qayninpi.

 

Qhari churinpa

ima kananta,

ataw qellpuyoq

q’aya kananta.

 

Chakinpamantas

wawa paqarin,

rakhu tulluyoq

waman ñawiyoq.

 

Q’aqochallaraq

kashaspas payqa,

waman q’esata

horqorqamusqa.

 

Tayta wamankunas

atipakunku phiñasqa,

warmataq yawarchaska

munayninta hunt’an.

 

Kinsa uñatas chitan

iskay wañun hoqlla qepan,

chakichanmanta watuchasqata

kawsachin llank’aywan.

 

Ña waynachaña

kashaspantaqsi,

Apu kunturwan

churanakusqa.

 

Kay Willka Paqoq

churintaqa,

Apukunachá

yanapan riki.

 

Illa tuwintas

kuntur kunpasqa,

hinas maqt’aqa

kunturta sipin.

 

Hoq warak’aypis

umanta ch’eqtan,

Mallku kasqanta

mana manchaspa.

 

Kaykunamantas

taytan Paqoqa,

Apukunaman

haywakoq pacha.

 

Qhari churinpa

huchakunata,

panpachananpaq

qhawarinanpaq.

 

Mana hinaqa

wayna maqt’aqa,

rumimanchari

tukunman karqan.

 

Hoq kutinpiqa

pumañataqsi,

llama kuchuta

hap’irqoshasqa.

 

Soq’añasqatas

washkhata apaq,

chaytas chanqaykun

pumaq kunkanman.

 

Hinaspas chutan

qaqa pataman,

chaypitaq seq’on

salqa michita.

 

Unaymantaqa

suwañataqsi,

tutaq sonqonpi

llamanta suwan.

 

Kasqanpachallas

yupinta qatin,

tariparqontaq

ñawi ch’illmiypi.

 

Suwakunaqa

tawas kasqaku,

chay runaq uywan

qateqkunaqa.

 

Tawantinkutas

Willkawamanqa,

maqanakuypi

wikaparparin.

 

Ch’awar washkhanwan

t’eqespataqsi,

atoqkunata

p’anaspa apan.

 

Phawayllatas

puririykachin ñanninta,

llamakunapas kutiyrapunkus

wasinmanqa.

 

Phuyu Qotañaqamas

chayachin,

phiña taytanpa

unanchananpaq.

 

Tawa takarpus

chutan allinta,

maki chakinta

suwa runata.

 

Tawantinkusyá:

wanasaqpunin

thuqasaqpunin,

nispa mañakunku.

 

Suwakunatas

allintapuni,

muchuykachinku

huchankumanta.

 

Willka Paqoqa

musphaspas rikun,

qhari churinpa

qharikasqanta.

 

Karupiraqsi Willka Paqoq

allin chakrankuna,

Toqsanqota

qocha chaypiraq.

 

Chay chakratapas

Willka Wamanqa,

sapachallansi

allinta llank’an.

 

Qasirqospaqa

qochatas haykun,

chinparqontaqsi

wanp’u patapi.

 

Kasqan pachallas

kutirqanpunpas,

wayratawanpas

atipasparaq.

Dejar respuesta

Please enter your comment!
Please enter your name here

Columnistas de Hoy

spot_img