0,00 S/

No hay productos en el carrito.

18.3 C
Lima
sábado, mayo 18, 2024

Pillpintuq phalariynin (El baile de la mariposa)

Pachamama saminchay p’unchawmanmi,

ayllukuna hanan sayamanta uraymuranku,

urinsayamantapas wichamuranku,

qollanankunawan, qhaswankunawan.

Llaqechapas suyaranmi chawpi llaqtapi,

pallakunawan k’anchay k’anchay p’achasqa,

tususpañan munay kurkunkuta maywikachanku,

pillpintu hina makinkuta pukllachispa.

Chay illariypin, manaraq k’ankakunaq takiyninpi,

Ch’askacha sayarichiran huchu’y turachanta:

-Uywachanchiskunatan apanayki uskaylla,

hoq watakuna hina hatun michiyman,

karu orqoman, qaqapi Qhapaq Wanka wasinchisman. 

-Wataruniñan mikhuynikita unu q’oñitapas,

manan pillapas yachanmanchu ruraynikita,

noqañan tayta mamachistapas willasaq;

suyawankin maskhamunaykama.

Marq’arin waqayuspa malqochanta.

Turachantaq puñuyllaraq tapurikun:

-Panay, Inti Taytanchis qaqa wasimanchu

puririsaq? Imaymanata qhawarispa,

mana awqanchiskuna qatiwananchispaq?

 

-Imanaqtintaq llipin uywakunatari apasaq,

imapitaq puririnqakuri khunpanchiskunari,

yana mulachallatapas saqeymancha?

Llakisqa rimarin, weqenta makinwan ch’akichispa,

usqhayllataq puriripun.

Chawpi huñunakuypi Sapa Inti ch’askashaqtin,

machu Qollana qallarin llaqtakunawan;

Tayta Apukunaq haywarikuyninta:

-Mañarikusunchis Pachamamanchista.

Allin Kawsay kutinpuy… kutinpuy,

Allin LLank’ay kutinpuy… kutinpuy,

Allin Munay kutinpuy… kutinpuy,

Allin Yachay kutinpuy… kutinpuy.

Ñawpachin Ch’aska warma aqllata,

makinmantaq churan Illapasqa

ch’uya ch’ila rumita:

-Kunanmi ckaskishanki Mama Waqoq,

Tupa Yawrinta, Hatun Iñaqa Aylluq Mallkinta;

Wankanchiskunapin Illapayta maskhamunanki,

chayta tarispañan kutinpunki,

mosoq qollanay k’anchaq qespinaykipaq. 

-Rimarispaykun, yuyaychaykuñan waynakunawan;

taytanchiskunaq yachachiwasqanchista,

ayllunchiskunaq suyuchasqa kawsayninta;

mana panpachasqa ch’usaqyananpaq.

-Llaqtapin qhepasun machu payakuna, herq’ekunawan;

iskay ñeqenkunan wichapunqaku punakunaman,

kimsa p’akiytaq urayunqaku

hatun qocha yunkarayman.

-Hunt’ay yuyaywanmi

maskharani kay puririyta:

Pacha Mamanchista,

pukyunchiskunatapas tapurispa.

Chaymi kamachiyninku,

napaykusunchismi kunanqa,

cheqaq maskhayninchis tarinanchispaq.

Paypas yupaychallantaq.

-Apukunaq munayninchá,

mana ayllunchiskuna chinkapunanpaq?

Tapurikunku, qhari warmi, machu paya,

warma waynakunapas.

Napaykunkun qoqa saminchaywan,

qhaswataq haykumun, aqhachawan mat’isqa.

Urpichakunan p’itaykachanku,

turaychakuspa, ñañaychakuspa.

Llaqechaq asikuynin manaña chayanpunchu,

mancharisqachus otaq sayk’usqachus;

qhawariyninpas yuyayninpas chinkasqan,

sonqonpas khatatashanmi:

-Imaraqcha kallpachakamunqa,

hunt’aytaqa hunt’amushaqpunin,

Tayta Inkachiskunaq mañawasqanta;

rimarikun sapallanpaq.

Manaraq p’unchaw tukusaqtinmi,

rasph’iyusaqtinllaraq ch’usaqchakapunku;

munaychallata tususpallan,

lloqserapunku llaqtamanta.

Qhari warma tusuqmasinkunawan

puriripunku, mosoq kawsay maskhariq,

pacha mama nanaypi,

manaraq ñak’ariy sayarisaqtin.

Machu, paya llaqtakunataq

machayman haykuypunkuña,

mana waqay, mana llakiy

chayamunanpaq.

Dejar respuesta

Please enter your comment!
Please enter your name here

Columnistas de Hoy

Seguidores

2,913FansMe gusta
510SeguidoresSeguir
5,258SeguidoresSeguir
450suscriptoresSuscribirte

Suscríbete a nuestro boletín

Bienvenido(a)👋 Un placer conocerte. Regístrate para recibir contenido interesante en tu bandeja de entrada.

¡No enviamos spam! Puedes desuscribirte en cualquier momento.