Qelqariq: Jesús Manya Salas
Taytankus wañupuska, machu kayninpiña, atispakuspa pachaq watatapas; karu karu llaqtakunamantas, chayamuskaku churinkuna, hawayninkuna, kimsa warminkunapas payachallañas; llipinkus huñuska rimarinkun: Munaychatan p’ampasunchis p’iña salk’anchistaka, llaqtacha rimarinman millayta, mana allinta rurasunman chayka.
Wasimasinkunapas, uskayllas chayachimunku tautinkuta, ayakunaq takiwan kacharparinankupaq; yana chakanapas k’askaskañas hatun punkupi; purun llaqtakunapas waqyariskañas hamunankupaq: Allin runataq qaran, varayoqninchis kaspan, rimarinkun paykuna pura.
Puririnkus ayakunaq p’ampa pataman, sapanka samariypis, kamachiqkuna hamutanku apu rimaypi; chaymantaq uskaylla uqhiakun t’irilluta sutinpi: Llank’aysapa, munaysapa, yachaysapa, yuyaysapallan karan, kay ñaupa umalliqninchiska; chaynatas misk’i rimayllawan qachapunku, wañuqta.
Churinkunaqa qawanakunkus, tapunakunkus mancharisqa: Imaynallamanmi cheqaqta k’amipunkaku; warminero, wallpa chawa, k’uchi simi, uywa suwa, qasqantari?
Manaraq macharusaqtinkus, wañuq kurkurninta, wikapanku hatun t’oqoman, allpawantaq p’ampanku husqaylla: Paqtataq sayarinpunman ukhu pachamanta, hatun rumikunawan ch’aqmaychis, mamakuna t’ikachata t’aqariychis, hanaq pachaman chayapunanpaq.
Machaq masinkunaqa, llaqta warmi qhari ch’onqakunapas, pawayllas aqhachata mañakunku, t’irilluchapas chayamunsis, mana millay rimariy, mana llulla tapukuy qacharinankupaq.
Tawtinkupas ch’akallañas takiyun, harawichata waynuchayuqta tusunankupaq; qhaswapas kutipunyá machu ayaq wasinmanka, tutallapiña; chaypipas supaytas machayunku t’ilinankukama.
Chaylamansis p’iña uyanta churakuspa, kuraq churin tapurin llipinkuman: Imanaqtinmi mana pillapas waqarankuchu taytaychismantarí; chaypiñas yuyaychakusaqtinku, k’uchumanta qhaparimun sullk’a ususin: Qonqarapuskanchisyá, imaynan qonqawaranchis noqanchistapas hina, paypas; Chiu, p’enqaskas uyanku, umankutapas k’umuchinku, upallaskas wasipas.
Hoq, iskay, kimsa, tawa, pisqa, soqta, kanchis, esqon, pusaq, chunka, umankupis yupasanku toqyamunankama: Waaaaaaaaaa haaaaaaaaaa hallaaaaaaaay; llipillankus yachachiska hina, ph’atachinku asikuyta, machu wañuq kikichallanta, ispakunankuqama.
